Leung vax num blèueng ci rang lieh kah páng
Vax num blèue ngan àh cih lien lieh yàwng lieh, yaox cih liex ci ráng lieh kah luang. Vax pa ni tui cih tìex, cìx cáng paeeh kah líak, háwiek líak cìx cáng còx rop rang heun kah mù méen klùang. Cìx cáng cí tòh tàeex héun kah màwng, són lien cih caix sáee blàk muak heun. Tòh cìn cáng lai rà plàk. Taix plàk còx cih tàeex héun kah méen klùang. Taix plàk cìx cáng tóh kah ìeawx tàeex, són lax blèe ngo héun. Háwiek cìx cáng túang kah kròh. Ngan ùt háwiek króh cìx cáng cí tui mawieng tái prèm còx pi tawp heun kah. Gaix án cìx cáng cí sawk káox kaing cìx cáng húak kah kròh.
Háwiek gaix án ngan ùt súm ci cih ráng lieh cìx cáng tui àw páng, tui tawx mawieng tái prèm, meu kaox káing kròh, cìx cáng síeh kah mawh blìah mawh blìah. Háwiek cìx cáng sáee nawng àw páng. Háwiek cìx cáng sáee ngo heun blèe kah dòt lieh kah tùak. Ngan ùt háwiek túak cìx cáng tawp kah mawieng tái, tawp cìn kah lìng mawk phúan mìnìt. Háwiek gaix án ngan ùt háwiek naok a ching heun cìx cáng plák. Àn nyam réu án páng cáng kawp kàp dang tái. Gaix án cìx cáng caix lup kah ráng lieh kah luang dìeh. Én mawh líe leung vax num blèue, mawh kriex cih ráng lieh kah móm.
Vax num blèue, ngan ci cih ráng lieh kah luang ni àh cih mom lieh kah. Tawx ráng cih kawh khám káh. Kawng kawh tà lie caix prax. Ráng sáeek kawh kian kah àh cih yuh ní. Ngan piax súm ci ráng lieh kah luang, yaox mieh liex cóx yuh ní. Lak num lup mìen àn ni jawk líe si bráix, viax líe síeaw mawh mèut ngo. Beun puah boh líe kah ngo cáng pá síeaw.
Lak vax pui num blèue pi kuat tà àh, kùan yawm tà àh yaox cih liex ci ráng lieh tòm se. Èx cáng pá lot àh vax yáwng cih liex yuh ní. Èn nyam vax én co tà cih lie thak ci ráng lieh kah páng.Beun puah én co ùt òt cih kah tàh pi còx meo pui. Són lien cih móm ráng cix kawh yaox thú thí kah tàh pi thú thí ráng. Ngan paing ráng cih cìx cáng àh móm ráng lieh. Nam yawm si gràk cix kawh lup kah dòt lieh. Tawx ta na khá, tawx nam háwm puax cih ùt men. Én ni mawh líe pi caee pui én co.
Leung tàing péun
Són lie còx péun tàing péun. Lo heh kah Si gùan, lo heh kah má, lo heh kah kreung krao heun pi mawh riah dàx, riah kàt ráx, nú màox, keu kang pá, kao kuai, tawx màox yàng, èn cih mawh kreung krao lie yaox lo kah num còx heh péun. Ngan lie ùt tìe lieh còx péun, vax pa hú baih heh òx pawx nawng laeek. Èx cáng ìng pak má jìeh má glax heun kah. Pun lien piex pon maox pak pun àn. Háwiek pak hèn má jìeh, má glax heun kup kup, èx cáng gàx húak kah kròh nèue. Co húak hèn má heun, gáix àn, èx cáng hú sawk kreung krao heun, pi lien heh nàix yaox lo kah pi mawh riah dàx, riah kàt ráx, nú màox, keu kang pá, kao kuai. Èx cáng ìng ruan mawh meo mawh meo. Riah dàx, riah kàt ráx, nú màox èn cih ni còx heh caong káwt heun kah. Keu kang pá, kao kuai èx cáng còx Kàing vong caong vong heun kah.
Gáix àn èx cáng tìe lieh táing má jìeh, má glax heun. Háwiek tàing hèn má jìeh má glax heun. Èx cáng cí hú baih gang heun nawng laeek. Háwiek ìng men kreung krao heun cih, èx tìe lieh kat kah màox yàng kah lih mawh péun dìeh.
Gáix àn èx cáng hú sawk coh ìeaw lieh nawng yàong kàw, yàong ka kaw, yàong síam, yàong plawng dìeh.
Leung tàing kàing dài, yùh, màn
Num lie tàing meo màn, yùh, kàing dài, yaox heh vax dùak cì héun cih. Ngan laeex èx kawh yaox kríex. Yaox heh vie kèue héun men. Ngan mawh kàing dài, yaox heh vie kèue luang, kèue paing, kèue singá, kèue léung, kèue sigràk, kèue tai kòx, èn cih mawh líe pun lie tàing kàing dài kah.
Ngan lie tàing yùh, yaox heh vie kèue luang, kèue paing, keue sigràk, èn mawh líe pun lie tàing yùh. Ngan lie tàing màn, yaox heh vie màn paing. Ngan lie òt tàing, yaox heh liex kùh èup càn. Èx cáng nàix ká àn kèue meu èup càn nawng dong go lox.
Gáix àn, èx cáng yáong àn kèue yáng àn èup, èx cáng háwie, èx cáng sidiat kah kròh. Háwiek, èx cáng teh kàk, èx cáng vuak, háwiek èx cáng sáee kah àn cí. Háwiek èx cáng vax sáee àn kèue nawng àn káo, èx cáng lawng sáee nawng àn peem. Gàix àn, èx càng nàix tàwx meu kèue mat lieh kah àn káox mú, són lie yaox rap bùai pi háwiek táing lieh. Háwiek, èx cáng teh sáee káox kah àn káo són lie nyam kah àng.
Hawiek, èx cáng teh klìng kèue luang heun kah àn kàk, èx cáng teh sáee àn láwt kah àn kuang, èx cáng klìng àn kèue kah dìeh. Háwiek klìng hèn, èx cáng teh sáee nawng àn sóe. Èx cáng tìe lieh caix táing mawh màn dìeh.
